काठमाडौँ । डिभिजन वन कार्यालय ललितपुरले गोदावरीको वन क्षेत्रबाट अवैध रूपमा ढुंगाखानी उत्खनन, ओसारपसार, निकासी र बिक्री गरेको अभियोगमा तीन व्यवसायीविरुद्ध मुद्दा दायर गरेको छ । जिल्ला अदालत ललितपुरमा गोदावरी ६ स्थित निराकार रोडाढुंगा उद्योग प्रालिका सञ्चालक मधुसुदन डोटेल, ढुंगा उद्योग प्रालिका सञ्चालक वीरेन्द्र महर्जन र मच्छिन्द्रनाथ मल्टी प्रपोज प्रालिका सञ्चालक केदारनाथ तिमिल्सिनाविरुद्ध अभियोगपत्र दायर भएको हो । वन ऐनविपरीत कसुरमा निराकार ढुंगा उद्योगका डोटेललाई २ करोड ९५ लाख बिगो कायम गरी बिगोबमोजिम थप सजाय, ढुंगा उद्योग प्रालिका महर्जनलाई ३ करोड २५ लाख बिगो कायम गरी सोबमोजिम थप सजाय र मच्छिन्द्रनाथ मल्टी प्रपोजका तिमिल्सिनलाई ३५ लाख २४ हजार बिगो कायम गरी सोबमोजिम सजाय हुनुपर्ने मागदाबीसहित अभियोगपत्र दायर गरिएको छ ।यसअघि अख्तियार दुरुपयोग अनुसन्धान अयोगले गोदावरी नगरपालिकाका मेयर गजेन्द्र महर्जनसहित हाल अभियोगपत्र दायर गरिएका तीन व्यवसायी र थप पाँच जनाविरुद्ध खानीबाट उत्पादित वस्तु निकासी गर्दा आर्थिक ऐनमा प्रदेश सरकारले तोकेको रकमभन्दा घटी राजस्व तोकी भ्रष्टाचार निवारण ऐनअन्तर्गत कसुर गरेको भन्दै विशेष अदालतमा मुुद्दा दायर गरेको थियो । उक्त मुद्दामा २०८१ साउन ३० गते फैसला गर्दै विशेषले मेयर महर्जन, तीन व्यवसायीसहित सबैलाई आरोप दाबी पुष्टि हुन नसकेकाले सफाइ दिएको थियो ।